0 قصيدة ربيع الوطن



(ربيع الوطن)



شفت الوطن وشفت ربيعة،،،
ضايع ضيعة،،،
بين الموت وبين قطيعة.
شفت الوطن اليوم مهبي..صاير كيف السكران.
ضاربها لا فوق معبي...خلطها من كل ألوان.
عشرة إيطيح ومرة إيصبي...ويقوّد فيه الشيطان.
دايخ مش عارف ما يبي،،،ما عجبه قديش فلان.
هادايا ماهو متربي،،،وهدايا معارض كان.
هاداكا ما يعرف ربي،،،وهادايا من حزب إخوان.
ما عجبك لا هادا تبي،،،يخدم في النظام زمان.
وفيك اللي سارق متخبي،،،سكّر لعيون ولودان.
ناديتي ما باش يلبي،،،داير روحه مش سمعان.
دوختي راسي يا حبي،،،
وطن ربيعة،،،،
 صاير كيف السنة وشيعة.

شفت الوطن وشفت ربيعة،،،
ضايع ضيعة،،،
بين الموت وبين قطيعة.

شفت الوطن وشوفه توا،،،قديش ضغاين واحقاد.
ما عادت في الناس مروّه،،،لا عاد رسملا ميعاد.
يا ربي فكنا من سوا،،،وألطف يا رب العباد.
حريه جاتك بالقوة،،،في شانك راحت لبلاد.
خش البوم عليك وعوا،،،حط عليك الهم وزاد.
ربيعك حامي مقطع نوا،،،شفشنا يا ودي ساد.
إن كان ربيعك هكي جوا،،،امال صيفك كيف شكله عاد.
واللي صاير هوا هوا،،،شبكة خنابة وفساد.
حريه شكليه و دوّه،،،والباقي هدراز كساد.
لا حول بالله القوة،،،يكفينا شر الحساد.
ويامولاي اكفينا سوا،،،،
 وقت قطيعة،،،،
 دارو فيه أعمال فظيعة.

شفت الوطن وشفت ربيعة،،،
ضايع ضيعة،،،،،
بين الموت وبين قطيعة.

تحياتي: علي الكاسح

0 comments:

إرسال تعليق

Related Posts Plugin for WordPress, Blogger...
Twitter Delicious Facebook Digg Stumbleupon Favorites More

 
Free Web Hosting